05/11/2024
#منقول
ما المقصود بالــ (WLL) و (SWL) ؟
الإجابة:
🔵.....أولاً الـ (WLL).....🔵
الـ WLL هو اختصار لـ "Working Load Limit"، أقصى حمل للتشغيل.
ودا هتلاقيه مطبوع علي وسائل التصبين زي الاقفال والماستر لينك بتاع السلسلة والهوكات أو علي تكت (Label) بيكون مرفق مع الواير...
(زي اللي في الصور كدا👇)
ودا معناه أن الحمل دا هو أقصى حمل تشغيل آمن ممكن تتحملة وسيلة التصبين دي...
وعشان أحمل وسيلة التصبين دي أقصى حمل ليها،
لازم تكون الزاوية عمودية علي الطرد (90°).
والحمل الآمن دا بيتم تحديده طبقاً لمعامل أمان لا يقل عن واحد لخمسة، (طبقاً لتشريعات الأوشا)...
يعني الواير أو أداة التصبين بتتحمل علي الأقل خمس أضعاف الحمل المحدد للتشغيل اللي هو WLL قبل ما يحصلها damage أو breaking.
✔️ معلومة إضافية:
معامل أمان الوايرات ممكن يزيد عن 1 : 5 لكن ميقلش
زي مثلاً:
هتلاقي معامل أمان الواير القماش من 1 : 7 (طبقاً للمُصنع).
وبيزيد معامل أمان الواير في حالة استخدامه في سلة رفع الأفراد،
من 1 : 7 لو الواير لا يقاوم الإلتفاف
ومن 1 : 10 لو الواير مقاوم للإلتفاف (بيكون الحشو واير آخر بيكون مجدول في عكس اتجاه جدلات الواير).....
معامل أمان الواير المستخدم في السقالة المعلقة بيكون
من 1 : 6.
✔️ طيب ازاي أحول معامل أمان واير مكتوب في شهادة المُصنع بتاعته أنه من 1 : 5 وأخليه من 1 : 7
هتضرب قدرة الواير (WLL) × 5 اللي هو معامل أمان التشغيل هيطلعك معامل الكسر اللي هو Minimum) breaking limit. MBL) وتروح قاسمهم علي معامل الأمان اللي أنت عايزة والناتج اللي هيطلع هيكون هو دا معامل أمان التشغيل اللي أنت عايزة.
👈 مثال:
واير ال WLL بتاعه 5طن،
معامل أمان الواير من 1 : 5،
عايز ارفع بيه سلة أفراد (Man Basket) وهضطر أزود معامل الأمان لـ 1 : 7
5 طن (WLL) × 5 ( معامل الأمان) = 25 طن (معامل الكسر MBL) ÷ 7 ( معامل الأمان المطلوب) = 3.5 طن (WLL المطلوب لسلة رفع الأفراد).
🔵.....ثانياً الـ(SWL).....🔵
الـ SWL هواختصار لـ "Safe Working Load"، الحمل الآمن للعمل.
ودا بيكون الحمل الآمن للعمل اللي بتم تحديده طبقاً لطرق وزوايا التصبين المختلفة (رأسي ، رأسه في عبه ، سلة)...
ودا بيتم حسابه من قيمة الحمل المحدد للتشغيل (WLL).
يعني هتلاقي أن قدرة الواير (capacity) بتتغير مع تغير طرق التصبين أو الزاوية
الرأسي بيشيل 100% من حمولته.
رأسه في عبه بيشيل حوالي 80% من حمولته..
السلة بيشيل 200% من حمولته ( لأنك بتكون جاوز الواير أو مِدبله "بلغة الموقع").
بس القيم دي فقط... في حالة أن الواير عمودي علي الطرد،
لكن لو فيه زاوية علي الواير هتقل طبعاً علي حسب قوة الشد الناتج من الزاوية دي.
زي ما هو واضح في الصور👇....
يبقي عشان أحدد أقصي قيمة آمنه للواير أو وسيلة التصبين (SWL)..
لازم أراعي:
طريقة التصبين والواير بيشيل كام في الماية من حمولته فيها.
زاوية الميلان وأحسب منها قوة الشد علي الواير...
وأراعي كمان الزاوية اللي علي الواير في طريقة التصبين.
