11/09/2026
Li ddaħħal kelb f’ħajtek hija għażla.
Din mhix sitwazzjoni fejn, pereżempju, ħriġt tqila bla ma kont qed tistenna u f’daqqa waħda kellek tadatta ħajtek kollha biex trabbi tarbija.
Kelb ħadd ma jimponih fuqek.
Int tagħżel li ġġibu d-dar. Int tagħżel li tagħmlu parti mill-familja tiegħek.
U għalhekk, qabel tieħu dik id-deċiżjoni, trid taħseb lil hinn mill-eċitament tal-ewwel ġranet.
Tiflaħ għall-ikel, il-veterinarju, il-mediċini u emerġenzi?
Għandek ħin għall-mixjiet, it-taħriġ u l-kura li għandu bżonn kuljum?
X’jiġri jekk tmur tgħix post ieħor?
Jekk ikollok tarbija?
Jekk tintemm relazzjoni?
Jekk titlef ix-xogħol?
Jekk il-kelb jiżviluppa problemi ta’ mġiba?
Jekk jimrad u f’daqqa waħda jkollok spejjeż ta’ mijiet jew eluf ta’ ewro?
U jekk jiġrilek xi ħaġa lilek, min se jieħu ħsiebu?
Naturalment jeżistu ċirkostanzi ġenwini fejn persuna verament ma jkollhiex għażla oħra ħlief li ssib dar oħra għall-kelb tagħha. Il-ħajja kultant tinbidel b’modi li ma nkunux nistgħu nbassru.
Imma mijiet ta’ klieb li llum jinsabu fix-shelters, u għand fosterers ma jistgħux kollha jkunu hemm minħabba ċirkostanzi inevitabbli.
Wisq klieb qed iħallsu l-prezz ta’ deċiżjonijiet li ttieħdu mingħajr ma wieħed ħaseb biżżejjed fit-tul.
Kelb mhux xiri impulsiv.
Mhux rigal għax it-tfal ilhom jitolbu wieħed.
U mhux xi ħaġa li żżomm biss sakemm il-ħajja tibqa’ konvenjenti għalik.
Qabel iġġib kelb, tistaqsix biss:
“Nixtieq kelb?”
Staqsi lilek innifsek:
“Jien lest/a nkun responsabbli għal dan il-kelb għall-10, 15 jew saħansitra 20 sena li ġejjin — anke jekk ħajti tinbidel?”
Għax meta tagħżel kelb, tkun qed tagħżel ukoll l-impenn li jiġi miegħu. 🐾
