THIT Engineering

27/09/2024

အုန်းဆီ (Coconut Oil) အကြောင်းလေးလည်း ဖတ်ကြည့်နော်။

#အုန်းဆီ (Coconut Oil)
**********************
အုန်းဆီအကြောင်းပြောမယ်လို့ စဉ်းစားလိုက်တော့ ငယ်ငယ်က အဘွားနှင့် အတူနေရတာကို ပြန်သတိရမိတယ်။ ကလေးအရွယ် အိမ်မှာ အဖေရောအမေပါ အလုပ်သွားတော့ ကျွန်မတို့ မောင်နှမတတွေ အဘွားနှင့် တစ်နေကုန် နေရလေ့ရှိတယ်။ အဘွားချက်ကျွေးစားသည်ကို အားပါးတရ စားကြသည်။ အဘွားက မြန်မာမုန့် အကုန်လုပ်တတ်တယ်။ အဲ့ဒီမှာ ဘာသတိထားမိလဲဆို- အဘွားက အုန်းနို့ကို အုန်းဆီ ချက်ထားပြီး ထမင်းနှင့် စားလေ့ရှိတာပါ။

အဲ့အချိန်က ကျွန်မတို့ အိမ်နောက်ဘေးမှာ အုန်းပင်တစ်ပင်ရှိတယ်။ အုန်းသီး အမြဲသီးပြီး အဘွားက အုန်းနို့ယူပြီး အုန်းဆီချက်လေ့ရှိတယ်။ အုန်းနို့ကို မီးသွေးမီးဖိုမှာ မီးအေးအေးနှင့် ခမ်းအောင်တည်ပြီး အုန်းဆီနှစ်ကလေးတွေ ရလာတဲ့အထိ ချက်တာပါ။ အုန်းဆီနှစ်ဝါဝါလေးတွေကို ဆနွင်းမကင်းမုန့် အစရှိသည့် မုန့်တွေမှာ အပေါ်ကနေလဲ ဖြူးစားလေ့ရှိပါတယ်။ အဘွားက အဲ့လိုစားရင် ကျွန်မတို့ကလေးတွေလည်း လိုက်စားကြသည်။
စားလို့အရမ်းကောင်းတာကိုတော့ အခုထိသတိတရ ရှိနေတယ်။ အဖေကတော့ သိရင် ဆူလေ့ရှိပါတယ်။ အဘွားက သွေးတိုးရှိတယ်လေ။

တန်ဆေးလွန်ဘေး ဆိုသည့်အတိုင်း အုန်းဆီစားသုံးတဲ့အခါ ကောင်းကျိုးဆိုးကျိုးတွေကို လေ့လာ ကြည့်ရအောင်နော်။
ဒါကြောင့် ကျွန်မတို့နှင့် အလွန်နီးစပ်တဲ့ အုန်းဆီအကြောင်းလေးကို ဒီတပတ်အတွက် တင်ဆက်ပေးပါ မယ်နော်။

MCT Oil အကြောင်းရေးတည်းက တဆက်တည်း အုန်းဆီအကြောင်း ရေးမယ်လို့ စိတ်ကူးခဲ့ပါတယ်။ အုန်းဆီသည် Medium-chain Triglycerides အများစု ပါသောဆီဖြစ်လို့ ကျန်းမာရေးလိုက်စားသူများနှင့် အားကစား သမားများ အတွက် အားထားရာဆိုတာ သိခဲ့ကြပြီးဖြစ်တယ်နော်။

အုန်းဆီထဲတွင် Medium-chain Triglycerides (MCT) များ ဖြစ်ကြသော
• caprylic acid - C 8-0 : (8%) ,
• capric acid - C 10:0 (7%) ,
• lauric acids - C 12:0 (49%), နှင့်
Long-chain Triglycerides (LCT) များဖြစ်ကြသော
• myristic acid - C 14:0 (8%),
• palmitic acid - C 16:0 (8%),
• stearic acid - C 18:0 (2%)
• oleic acid - C 18:1 (6%) and
• linoleic acid - C 18:2 (2%) တို့ပါဝင်သည်ကိုတွေ့ရှိနိုင်ပါသည်။

အထူးသဖြင့် အုန်းဆီထဲတွင် Lauric acids C12:0 သည် ၄၀-၅၀ ရာခိုင်နှုန်းနီးပါး ပါဝင်သည်ကိုတွေ့ရသောကြောင့် အုန်းဆီသည် Lauric Acids အုပ်စုဝင်ဆီအမျိုးအစားဖြစ်ပါသည်။

ထို့ပြင် အုန်းဆီသည် ပြည့်ဝဆီရာခိုင်နှုန်းများသောကြောင့် ပြည့်ဝဆီအုပ်စုဝင် ဆီအမျိုးအစား ဖြစ်သော်လည်း ကျန်းမာရေးနှင့်ညီညွတ်သော MCT Oil ပါဝင်မှုများသောကြောင့်လည်း ဆေးအဖြစ် စားသုံးသင့်သည့် ဆီဖြစ်ပါသည်။

ယခုနောက်ပိုင်းတွင် Cold- pressed နည်းဖြင့်ပြုလုပ်ထားသော Virgin Coconut Oil ကိုလည်း ကျွန်မတို့ စျေးကွက်တွင် တွေ့ရှိလာရပြီး စျေးကြီးပေး၍ စားသုံးလာကြပြီ ဖြစ်ပါသည်။

အုန်းဆီကို ဟင်းချက်ဆီ အဖြစ်ထက် ဆေးအဖြစ်သာ စားသုံးသင့်ပါသည်။
ပြည့်ဝဆီပါဝင်မှု များသောကြောင့် လိုသည်ထက်ပိုစားပါက နှလုံးရောဂါ အန္တရာယ်ရှိပါသည်။ အုန်းဆီကို ဆံပင်၊ အသားအရေ စသည့် အလှအပရေးရာများတွင်လည်း အသုံးပြုနိုင်ပါသည်။

အုန်းဆီသည် Smoke Point မြင့်မားပြီး အခန်းအပူချိန်တွင် အခဲအနေဖြင့်ရှိနေနိုင်ပါသည်။ ပြည့်ဝဆီဖြစ်သောကြောင့် အပူချိန်မြင့်မြင့်ကို ခံနိုင်ရည်ရှိပါသည်။ အုန်းဆီသည် အနံ့၊ အရသာ ပြည့်စုံသောကြောင့် မုန့်လုပ်ရာတွင်လည်း ထည့်သွင်းအသုံးပြုနိုင်ပါသည်။

ဒါဆို အုန်းဆီရဲ့ ကောင်းခြင်း၊ဆိုးခြင်းတွေကို အခုသိရှိပြီးဖြစ်လို့ ဉာဏ်ဖြင့်ဆင်ခြင်စားသုံးနိုင်ကြစေရန် တင်ဆက်လိုက်ပါတယ်။

photo: from internet






#ဆီအကြောင်းပြောကြမယ်

25/09/2024

မုန်ညင်းဆီ (Mustard Oil)
*************************
မုန်ညင်းဆီကို မုန်ညင်းစေ့မှ ထုတ်ယူရရှိပါသည်။ မုန်ညင်းဆီ ကို အချို့သော နိုင်ငံများတွင် ယဉ်ကျေးမှုအရ ဟင်းချက်ဆီ အဖြစ် အသုံးပြုကြသော်လည်း မုန်ညင်းဆီတွင် (erucic acid) ပါဝင်မှုများသောကြောင့် ရောင်းချခြင်း ကို ကန့်ကွက်ပြီး ဟင်းချက်ဆီအဖြစ်အသုံးပြုခြင်း သိပ်မရှိကြပါ။

မုန်ညင်းဆီ (Mustard Oil) သည် စျေးကွက်တွင် ဟင်းချက်ဆီအဖြစ် ရောင်းချသော ပန်းမုန်ညင်းဆီ (Canola oil ) နှင့် အမျိုးအစားမတူညီပါ။

မုန်ညင်းဆီ (Mustard Oil) ထုတ်ယူရန် မုန်ညင်းစေ့အမျိုးအစားအမျိုးမျိုးရှိသည့်အတွက် (erucic acid) ပမဏ ပါဝင်မှုနည်းသော မုန်ညင်းစေ့မျိုး ကို ရွေးချယ်ပြီး စိုက်ပျိုးထုတ်လုပ်ကြပါသည်။

မုန်ညင်းစေ့တွင် ဆီပါဝင်မှု ရာခိုင်နှုန်းသည် ၃၀ ရာခိုင်နှုန်းခန့် (30%) ပါဝင်ပါသည်။ မုန်ညင်းနက် (Brassica nigra)၊ မုန်ညင်းညို (B.juncea) နှင့် မုန်ညင်းဖြူ (B. alba) တို့မှ ထုတ်လုပ်နိုင်ပါသည်။

မုန်ညင်းဆီတွင် မပြည့်ဝဆီများဖြစ်ကြသော 60% monounsaturated fatty acids ၆၀ ရာခိုင်နှုန်း (42% erucic acid and 12% oleic acid) နှင့် 21% polyunsaturated fats ၂၁ ရာခိုင်နှုန်း (6% the omega-3 alpha-linolenic acid and 15% the omega-6 linoleic acid) တို့ပါဝင်ပါသည်။

ထို့ပြင် ( 12% saturated fats ) ပြည့်ဝဆီ ၁၂ ရာခိုင်နှုန်းသာ ပါဝင်ပါသည်။

သုတေသနပြုချက်များအရ မုန်ညင်းဆီကို အသုံးပြု၍ ပြုလုပ်သော Microemulsion cream ခရမ် များတွင် E coli. ဘတ်တီးရီးယား ကို ထိရောက်စွာ တိုက်ဖျက်နှိမ်နင်းနိုင်သည့် effective antibacterial agents အဖြစ် အသုံးပြုနိုင်သည်ကို တွေ့ရှိရပါသည်။

မုန်ညင်းဆီတွင် မလိုလားအပ်သော ဘက်တီးရီးယားများနှင့် အခြားသော အဏုဇီဝပိုးမွှားများ ကြီးထွားမှုကို ဟန့်တားပေးသည့် Glucosinolate ပါဝင်ပါသည်။ မုန်ညင်းဆီတွင် ပြင်းထန်သော မှိုသတ်နိုင်သည့် အရည်အသွေးများရှိသောကြောင့် မှိုပိုးဝင်ခြင်းနှင့် အရေပြားယားယံခြင်းများကို ကုသပေးနိုင်ပါသည်။ မုန်ညင်းဆီတွင် allyl isothiocyanate ဟုခေါ်သော ဓာတ်ပါဝင်ခြင်းကြောင့် ဖြစ်ပါသည်။ allyl isothiocyanate သည် ညှော်နံ့ကဲ့သို့သော အနံ့စူးစူးတစ်မျိုးကိုလည်း ပေးပါသည်။

မုန်ညင်းဆီကို အသုံးပြု၍ ခန္ဓာကိုယ်ကို နှိပ်နယ်ခြင်းသည် ခန္ဓာကိုယ် အစိတ်အပိုင်းများဆီသို့ သွေးစီးဆင်းမှုကို ကောင်းမွန်စေပါသည်။ မွေးကင်းစ ကလေးငယ်များကို မုန်ညင်းဆီဖြင့် လိမ်းကျံ နှိပ်နယ်ပေးခြင်းကို နိုင်ငံအများအပြားတွင် အလွန်အသုံးပြုကြပါသည်။

မုန်ညင်းဆီတွင် B-complex vitamins ဗီတာမင် အများအပြားပါဝင်ပါသည်။ မုန်ညင်းဆီသည် အရေပြားကျန်းမာရေးနှင့် သွားနှင့် ခံတွင်းကျန်းမာရေး အတွက်လည်း အသုံးဝင်ပါသည်။

ဒူးနာ၊ ခါးနာခြင်းများ နှင့် ခြေထောက်ဖောရောင်ခြင်း စသည့် အဆစ်အမြစ် နာကျင်ရောင်ရမ်းခြင်းများအတွက်လည်း မုန်ညင်းဆီ ကို လိမ်းပေးခြင်းဖြင့် သက်သာစေနိုင်ပါသည်။

credit: internet photo



#ဆီအကြောင်းပြောကြမယ်