What are the opening hours?

Monday 08:30 - 18:00 Tuesday 08:30 - 18:00 Wednesday 08:30 - 18:00 Thursday 08:30 - 18:00 Saturday 08:30 - 18:00 Sunday 08:30 - 18:00

GeoDesign Company, Piramagrun Street 11, Black House, 2nd Floor, As Sulaymaniyah (2026)

25/03/2025

GeoDesign got LiDAR!

دوای هەوڵی زۆر توانیمان ئەم درۆنەی وینگترا بە دەست بهێنین، کە دەقیقترین سێنسەری لایداری هەیە.

ئەم جۆرە سێنسەرە شوێنی کامێرای فۆتۆگرامەتری ناگرێتەوە، بەڵکو ئەو کەلێنانە پڕ دەکاتەوە کە لە ڕووپێویی فۆتۆگرامەتریدا هەن، وەک: بوونی سەوزایی و درەخت، شێواندن بەهۆی تەنی بەزر لە زەوییەوە، چوونیەکیی ڕووی زەوی (لە تەختایی و قیر و کۆنکریت و لەم بابەتانە)، بوونی هەور یا تەم، هەروەها قورسیی داتا و کۆمپیەتری بەهێز و کاتی زۆر بۆ پرۆسێسکردن. سێنسەری لایدار بۆخۆی تیشک دەنێرێت و وەریدەگرێتەوە، هاوشێوەی تۆتاڵستەیشنی ریفلێکتەرلێس، بەمەش بەربەستی ڕوونی و ناروونی نابێت. بەڵام بۆ دەستکەوتنی ئۆرثۆفۆتۆ هەر دەبێت بە فۆتۆگرامەتری کار بکرێت.

لە ئێستادا هەم درۆنی فۆتۆگرامەتریمان هەیە و هەم درۆنی لایدار، کە هەردوکیان پێکەوە باشترین ئەنجام دەدەن بە دەستەوە.

بەم نزیکانە تاقیکردنەوەی لەسەر دەکەین

18/11/2024

ئەمڕۆ بەردی بناغەی یەکتربڕی تۆفیق وەهبی دانرا
ئەم پرۆژەیە لە ساڵی ٢٠٢٢ لە لایەن کۆمپانیای جیۆدیزاینەوە دیزاینی تەواوەتیی بۆ کرا بە پالپشتیی دارایی کۆمپانیای ڕائیدة التعمیر و سەرپەرشتیی شارەوانیی سلێمانی. هەروەها لەلایەن نوسینگەی د. محمد ڕەئوفەوە چێککردنەوەی بۆ کرا.

پرۆژەکە لەلایەن کۆمپانیای تراویلکەوە جێبەجێ دەکرێت بە گوژمەی ١٢ ملیار دینار و ماوەی ٤٠٥ ڕۆژ، لە ژێر سەرپەرشتیی شارەوانیی سلێمانی. بە تەواوبوونی ئەم پرۆژەیە و پرۆژەی یەکتربڕی حەپسەخان، قەرەباڵخیی سەر شەقامی مەلیک مەحمود لە بەشی خوارەوە نامێنێت، هەروەها هاتوچۆی بەشی ناو شەستی و دەرەوەی شەستی ڕاستەوخۆ دەبێت و ئاڵۆگۆڕی ئاراستەکانیش بە خێرایی دەکرێن.

ئەمە دووەم پرۆژەی کۆمپانیای جیۆدیزاینە دەخرێتە بواری جێبەجێکردنەوە دوای یەکتربڕی حەپسەخانی نەقیب.

https://www.facebook.com/share/p/15EQmPDTP7/

08/11/2024

چۆن لە چەماوەی جادە یا پردا پرۆفایلی دروست دیزاین ئەکەیت؟

گەر تەماشای پردی حەپسەخانی نەقیب بکەن، پردەکە وەک ڕووتەختێک plane دەردەکەوێت بێ ئەوەی هیچ خواربوونەوەیەکی تیا بێت؛ بەڵام پرۆفایلی پردەکە بەو جۆرە نییە! وێنەی سێیەم بریتییە لە پرۆفایلی پردەکە، کە چەند چەماوەیەکی زۆر زەقی تیایە. بەڵام بۆچی ئەم چەماوانە دەرناکەون؟ ئایا خەلەتاندنی چاوە کە بە هۆی چەماوەی ئاسۆییەوە دەرناکەون؟

کاتێ لە بەرنامەی سیڤڵەوە بە سێ رەهەندی تەماشای پردەکە دەکەیت، هەمان شت لە واقعدا لە بەرزییەوە لێی بڕوانیت، یەک ڕووتەختی لێژ ئەبینیت بێ گێڕی و چەمانەوە. هۆکاری ئەمە دانانی چەماوەی ستونی vertical curve ەکانە لە شوێنی گونجاو. وەک چۆن بۆ دروستبوونی تاودان پێویست بە گۆڕانی خێرایی هەیە، بەڵام بەبێ گۆڕانی خێرایی، جوڵە لەسەر ڕێڕەوی چەماوە دەبێتە هۆی دروستبوونی تاودان (بەهۆکاری گۆڕانی ئاڕاستە)، هەمان شت بۆ چەماوەی ستونیش تەواوە. جوڵە لەسەر ڕووتەختێکی ڕێک بەڵام هەبوونی لێژیی چوونیەک، دەبێتە هۆی دروستبوونی چەمانەوە لە پرۆفایلدا، لە کاتێکدا ڕێڕەوە هەر وەک ڕووتەختێک دەمێنێتەوە! ئەمە لە دیزاینی فلکەشدا هەمان شتە. گەر بتەوێ فلکەیەکی تەخت و ڕێکت هەبێت و لێژییەکی گشتیی کەمی هەبێت، نابێ بەپرۆفایلی ئاسایی کار بکەیت، بەڵکو دەبێ بە feature line ڕووتەختێکی لێژ دروست بکەیت و پاشان ڕێڕەوە بازنەییەکە ئەم ڕووتەختە ببڕێت و بیکات بە پرۆفایکی دیزاین کراو، چ بۆ هێڵی بازنەی ناوەوە و چ بۆ دەرەوە.

دەتوانی لەسەر وەرەقەیەک تاقیی بکەیتەوە. کاتێ هیچ نەنوشتاوەتەوە و هیچ لێژییەکی نییە، ئەوا پرۆفایلی بازنەیەکی کێشراوی سەر وەرەقەکە یەک هێڵی ڕێک دەردەچێت بێ گۆڕانی بەرزی و هیچ چەمانەوەیەک. بەڵام لێژییەک بدە بە وەرەقەکە و پاشان پرۆفایل بۆ بازنەکە دروست بکە. بێ ئەوەی چەمابێتەوە، دەبینی پرۆفایلەکە شەپۆلی تەژێ یا تەژێ تەواو دروست ئەکات. ئەمە وەک جێکەوتی یەکتربڕینی نێوان لولەکێک و ڕووتەختێکی لێژە.

لەبەر ئەوە چ لە جادەکاندا، چ لە پردەکاندا، کاتێ پرۆفایل دروست دەکەن با جیۆمەتریی ڕێڕەوی جادە یا پردەکەتان لەسەر پرۆفایلەکە دانابێت و بزانن چەماوەی ستونی لە کوێدا دروست ئەکەن. ڕەچاونەکردنی ئەم ئەندازەگیرییە دەبێتە هۆی خواری و گێڕی لە پرد و جادەکاندا، کە دیاردەیەکی بەرچاوە!

ئاکۆ صمد

28/09/2024

فلکەیەک لە شارۆچکەی سویندۆنی بەریتانیا
فلکەیەکی گەورە پێنج بێچووە فلکەی تری لەخۆ گرتووە!
ئەمە لای خۆمان بێ شۆفێر چۆن بەکاری ئەهێنن؟

18/08/2024

ڕیگاوبانەکانمان سەرباری ئەوەی یەکجار بێکەڵک و خراپن و هەرگیز کەڵکی هاتوچۆیان نییە، لەگەڵ ئەوەشدا تێچوویان یەکجار زۆرە!

چۆن دەبێت پرۆژە تێچووی زۆر بێت بەڵام باش نەبێت، مەگەر نابێت ئەو دووە پەیوەندییان ڕاستەوانە بێت؟ هۆکاری ئەو دیاردەیە دابینکردنی خەرجیی سەرەتایی زۆر کەمە، بەڵام لە درێژ مەودایا بەهۆی چاکسازیی بەردەوام و بەردەوام چینی نوێی قیر، وادەکات لە ماوەی درێژخایەندا تێچووی یەکجار زۆر بێت و بۆ هاتوچۆش یەکجار بێکەڵک. بەپێی ستانداردی ئاشتۆ تێچووی شەقام بەو بڕە ناپێورێت کە یەکەمجار بۆی تەرخان دەکرێت، بەڵکو تێچوو/ساڵ لە ماوەی سەروو ٢٠ ساڵ حیساب دەکرێت. ئەمەش تێچووی سەرەتایی و چاکسازیی ساڵانە و ئەگەری ڕووداو و پیسبوونی ژینگە و تێکچوونی تەندروستی و زیاد سەرفکردنی وزە و زۆر شتی تر دەگرێتەوە.

هەندێ بەراوردی زۆر سادە بۆ تێگەیشتن:

بووە بە باو کە بە گشتی دوو چین قیر بۆ جادەکان بکرێت (٦ سم بایندەر و ١٠ سم ستابلایزەر)، لەگەڵ بەردی شکاو و تێکەڵەی جۆری A. ئێستا ئەوەش بووە بە باو کە تێکەڵە و بەردی شکاو زۆر ئەستور دەکرێن بێ هیچ حیساباتێک، بێ ئەوەی ئەوە لێک بدەنەوە کە بەپێی هاوکێشەی ئاشتۆ بۆ دیزاینی سترەکچەری جادە زیادکردنی ئەستوریی ئەو چینانە یەک ڕۆژ تەمەنی چینەکانی قیر درێژ ناکاتەوە!

جا کاتێ سترەکچەر نەمبەر SN بۆ ١٦ سم قیر چێک دەکەیتەوە، بە گشتی ئەو دوو چینە تەحەمولی ١.٥٠٠.٠٠٠ ئاکسل لۆدی ٨ تەنی دەکات (هەندێ پارامیتەر هەیە بۆ جۆری جادە ئەگۆڕدرێن و کاریگەرییان هەیە لەسەر ئەم ژمارەیە).
بەڵام زیادکردنی یەک چین قیری وێرینگ بە ئەستوریی ٥ سم ئەو ژمارەیە بەرز دەکاتەوە بۆ نزیکەی ١٢.٠٠٠.٠٠٠ (دوانزە ملیۆن)! واتا هەشت هێندە. ئەگەر ١٦ سم قیر تەحەمولی ١ ساڵ بکات (بۆ زۆرێک لە جادە دەرەکییەکان لە ساڵێکدا زۆر لەوە زیاتری پیا ئەڕوات)، ئەوا بە زیادکردنی یەک چین قیری ٥ سم ی تەمەنەکەی دەکەیت بە ٨ ساڵ.

خۆ گەر بێت و ئەستوریی بایندەر بکەیت بە ٨ سم (٢ سم زیادی بکەیت)، لەگەڵ چینێک قیری وێرینگ بە ٥ سم، ئەوا تەحەمولی نزیکەی ٢٢.٠٠٠.٠٠٠ (بیست و دوو ملیۆن) دەکات! واتا تەمەنی جادەکە ١٥ هێندە بەرز دەکەیتەوە.

ڕەنگە لاتان لۆجیک نەبێت، چۆن چەند سم ێکی کەم کە بە ڕێژەی ئەستوری زۆر کەمە، کەچی تەمەن بەو ڕێژە یەکجار بەرزە زیاد دەکات. ئەڵبەت پەیوەندیی نێوان سترەکچەر نەمبەر و ئاکسل لۆد نەک راستەهێڵ نییە، بگرە ئەوەندەی لۆگاریتم و زەرب و تەقسیم تیایە پەیوەندییەکە کێرڤێکی سەیر و سەمەرە دەرئەچێت.

جا تەماشا بکەن کاتێ بێ حیساب کردن بۆ زانست ئیش دەکەین، لە سەرەتاوە ٥ سم زیاد قیر ناکەین و رەزیلی دەکەین، بەڵام دواتر دێین هەموو دوو ساڵ جارێک چینێک قیر دەکڕێنین و ٦ سم ی دەکەین بەسەرا و هەر خراپ و خراپتر و بێکەڵک و بێکەڵکتر دەبێت.

هەرچەند ئەم دیاردەیە بە عەمەلیش بەرچاومانە و نکۆڵیی لێ ناکرێت، بەس شایەنی باسە ١٥ ساڵە باسی ئەکەین و وەک ئەوەیە گوێز بژمێرین...

19/06/2024

ئایا دەکرێت ئامێری جی پی ئێس بەکار بێت بۆ کۆنترۆڵکردنی بەرزی elevation لە کاری دروستکردنی جادەوبان؟

ئەڵبەت پێش هەر شت، دەبێت جی پی ئێسەکە جۆرێک لە سیستمی تیا بێت کە بەرزی لە ئاستی دەریاوە بێت orthometric نەک لە ڕووی ئیلیپسۆیدەوە ellipsoidal height. ئەو دووە جیاوازییان زۆرە، یەکەم لەگەڵ ئامیرەکانی لێڤڵ و تۆتاڵ یەک دەگرێتەوە، بەلام دووەم لادانی هەیە، کە هەندێ جێ کەمە و هەندێ جێ زۆر، وە ئاراستەش ڕۆڵی هەیە.

گریمان مۆدێلێکی بەرزیی زۆر دەقیقمان هەیە (کە مەحاڵە لە خوار ١ سم ەوە بەدەست بێت)، ئایا دەکرێ لەو دۆخەیا کۆنترۆڵی بەرزی بە جی پی ئێس بکرێت و ئامێری تۆتاڵ و لێڤڵ وەلا بنێین؟

لێرەدا کەوتۆتە سەر ئەوەی چ جۆرە جی پی ئێسێک و چ بەشێکی جادەکە دروست ئەکەین. حەتمەن کاتێ جی پی ئێس بەکار دەهێنین، هۆکارەکە بە پلەی یەک خێراییە، کە بۆ ئەو مەبەستە ئار تی کەی RTK بەکار دەهێنین نەک ستاتیک، کە هەم ماوەی خوێندنەوەی زۆری ئەوێت و هەم دواتر پرۆسێسی داتا ئەکرێت. گەر هەر جۆرە ئامێرێکت هەیە تەماشای داتا شیتەکەی بکە تا بزانیت وردپێویی RTK ئامێرەکەت چەندە. ئەمەی دەیبینن ئامێری لایکایە GS18 کە وردپێوترین ئامێرە، وردپێوی بۆ بەرزی بریتییە لە ١٥ ملم + ١ ملم / هەر کیلۆمەتر دوور کەوتنەوە لە بەیس. (گەر بەیس نێتۆرک بێت کەمێ دەقیقتر ئەبێت).

ئەمجا دەبێت ئاگامان لەو تێرمانە بێت لە داتا شیتا بەکار دێن. ئەکیورەیسی هاوتای ستاندارد دیڤیەیشنی دوو سیگما (2Sigma) یە، کە دەکاتە ٩٥٪ ی داتاکان، واتا بڕی ٥٪ ی داتاکان هەڵەیان لەوەش تێپەڕ دەکات. هەندێ لە ئامێرەکان لەبری ئەکیورەیسی دەنوسن RMSE، کە گەر بەرەنجامی کۆی هەڵەکان نزیک بێتەوە لە سفر ئەوسا ئەمە هاوتای یەک ستاندارد دیڤیەیشن (1Sigma) دەبێت، کە دەکاتە ٦٧٪ ی داتاکان، بەو پێیە نزیک یەک لە سێی داتاکان هەڵەیان دەچێتە سەروو ئەو بڕە! ئەڵبەت بۆ چێکی ئامێر هەڵەیە بچی خاڵێ یا دووان وەرگریت و بەرواردی بکەی تا بزانی بەو جۆرەیە یا نا، دەبێت دەیان خاڵ وەرگریت بۆ چێک و یاساکانی ئامار بەکار بهێنیت تا بزانیت هەڵەی ئامیرەکەت چۆنە.

زۆر ڕووپێو تەماشای کوالیتی سەر شاشەکە دەکەن، وادەزانن ئەوە یەکسانە بە هەڵەی ئامیرەکە، گەر ١٠ ملم ی نوسی ئیتر هەڵە یەکسانە بە ١٠ ملم! ئەوە تەنها دەستنیسانکردنێکی سەرەتایی کوالیتییە، بۆ ئەوەی گرفتی سیگناڵت هەبوو داتا وەرنەگریت، ئەگینا ئەوەی وردی دیاریدەکات زۆر ئاڵۆزە و بەمە دەستنیشان ناکرێت.

کەواتا گەر ئامێرەکەمان بڕی هەڵەی نەچووە سەروو ٢٠ ملم (بۆ بەرزی) ئایا دەشێت کۆنترۆڵی بەرزیی پێ بکەین؟ بەڵێ دەکرێت، بەڵام تەنها بۆ چینەکانی خوار سەبگرەید، یاخود بۆ ئاوبارە و هەندی ئایتمی تر. کاتێ دێینە سەر کۆنترۆڵی بەرزیی چینی تێکەڵە و بەردی شکاو و چینەکانی قیر، مواسەفاتی عێراقی خشتەیەکی داوە دەبێت بەوەوە پابەند بین، کە خشتەی R9/6 ە، وە لەو خشتەیەدا بڕی هەڵە بۆ چینەکان بەم جۆرەیە:
١- بۆ تێکەڵە و بەردی شکاو +١٠ ملم تا -٢٠ ملم
٢- بۆ چینی بایندەر +/- ٦ ملم
٣- بۆ چینی کۆتایی +/- ٤ ملم
وەک دەبینین هیچ کام لەو چینانە ناتوانرێت بە ئامێری جی پی ئێس کۆنترۆڵ بکرێن. گەر تێکەڵە و بەردی شکاو +/- ٢٠ ملم بوایا دەکرا، بەڵام بۆ زیادە +١٠ ملم ی داوە.
بۆ چینی تێکەڵە و بەردی شکاو دەتوانرێت تۆتاڵ ستەیشن بەکار بێت (بەمەرجێ باش کالیبرەیشن کرابێت)، بەڵام بۆ چینەکانی قیر هەر دەبێت ئامێری لیڤڵ بەکار بیت، بە تۆتاڵیش ئەو وردییە بەدەست نایات.

بەڵام بۆ دابەزاندنی پلان دەتوانرێت جی پی ئیس بەکار بیت، چونکە بڕی هەڵەی ئامیرەکە کەمترە و تۆلیرانسیش بۆ پلان زیاترە.

دەبیستم لە زۆر پرۆژەی ڕێگای خێرا جی پی ئێس بەکار دێنن بۆ چینەکانی قیریش، بانگەشەی ئەوە دەکرێ گوایا بە ملم دەری ئەکات! تۆ بڵێ کۆمپانیاکان بانگەشەکانی خۆیان بۆ ئامێرەکانیان ناتەواو بێت؟ یا ئێمە لە خۆیان باشتر بەکاریان دەهێنین و ئەوان لێی نازانن؟

15/05/2024

کارێکی خۆبەخشانەمان بۆ شاری سلێمانی: ڕووپێوی و دیزاینی ئەندازەیی بۆ یەکتربڕی ئەبو سەنا

ئەم یەکتربڕە لە ئیستادا هەیە، کە یەک پردە و یەک لوپی هەیە، بەم جۆرە ڕێک دەخرێت و هەردوو یوتێرنی سەر و خواری لەسەر شەقامی مەلیک مەحمود دادەخرێن

14/12/2023

فلکەخانە

ئەمریکا بەوە ناسرا بوو کە جادەکانیان فلکەی تیا نییە، هەمووی یەکتربڕی ئاساییە، چ بە ترافیک لایتەوە بێ یا بێ ترافیک، بەپێچەوانەی وڵاتانی ئەوروپا، بەتایبەت بەریتانیا، کە فلکە زۆر بەکار دەهێنن.

ساڵانێکی زۆری چاودێری، بۆیان دەرکەوت یەکتربڕەکان هەم هۆکاری ڕووداوی هاتوچۆی زۆرن، هەم قەرەباڵخی و دواکەوتن، بەهۆی کوشتنی کات و بۆشایی زۆر بە بەردەوامی. بۆیە بیریان لەوە کردەوە کە وردەوردە یەکتربڕەکان بکەن بە فلکە.

ئەڵبەت وەها گۆڕینێک لای خۆمان زۆر ئاسانە، کەسێک لە فەرمانگەیەکی دیاریکراو دەتوانێ سەربەخۆیانە ئەوە بکات. بەڵام لەو وڵاتانە ئەمە بە پرۆسەیەکی ئاڵۆزدا ئەڕوات. سەرەتا پێش هەر شت دیراسە ئەکەن و ستانداردی تایبەت بە خۆیان دادەنێن، پاشان پرس و ڕا بە خەڵک ئەکەن بۆ وەها گۆڕانکارییەک، پاشان دەیان بەرنامەی تەلەفزیۆنی و کۆبوونەوە بۆ فێرکردنی خەڵک لە بەکارهێنانی.

دەزگای فیدراڵیی ئەمریکا بۆ کاری ڕێگاوبان، ساڵی ٢٠٠٠ ستانداردێکی ٢٨٠ لاپەڕەیی دانا بەس بۆ دیزاینی فلکە! ئەمجا کۆبوونەوە بە خەڵک لە هەموو کۆمیونیتییەکان و پەخشکردنی دەیان بەرنامەی تەلەفزیۆنی لەسەر چۆنیەتی ئاژوتن لە فلکەدا.

ئەمەی دەیبینن یەکتربڕی شەقامێکی لاوەکییە لەگەڵ شاڕێی سەرەکی لە شاری ئۆشکۆش لە ویلایەتی ویسکانسن، کە ٤ فلکەی یەک لەدوای یەکی بۆ کراوە. ئەڵبەت دانەیەکی تری هەمان شێوەی تیایە، لەگەڵ دانەیەکی تری دوو فلکەیی. ئەمە لای خۆمان بکرێ عالەم قسەی لەسەر ئەکا و حەیات ئەبەن، ئەڵێن بۆ نایکەن بە جسر!

ئەوە پێش چەند ساڵێک هەموو یەکتربڕەکانی جادەی کانی بامان کرد بە فلکە، توانجی زۆربەی خەڵک، کە ئەندازیاریشی تیایە، ئەڵێن بۆ نەتانکرد بە پرد! هێندە عاجباتیین بە ئێمە بێ بەردەرکی سەراش بکەینە پرد. کەرەتێ لە کۆبوونەوەیەک پرۆفیسۆرێکی ئەڵمان بەشدار بوو، کە تایبەتمەندی بواری پلانسازی بوو. وتی ئەوە بۆ واز لەو شەقامی پیاسانە ناهێنن حەز دەکەن هەمووی بکەنە پرد و سەیارە بە خێرایی بڕوا و ژیانی تیا نەمێنی، بەڵام شەقام و شاڕی سەرەکییەکان کە پێویستیان بە پردە بیری لێ ناکەنەوە بچن پردیان تیا دروست بکەن!

شارەکانی ئێمە، بەتایبەت سلێمانی، هیچ مواسەفاتی شارسازییان تیا نییە، بەتایبەت لە ڕووی هیرارکی ڕێگاوبانەوە. کەس نازانێ کامە شاڕێیە و کامە ئارتێریاڵ و کامە کۆلێکتەر و کامە لاوەکی...

جا دیاردەیەکی سەیر لە شۆفێری خۆمان کە فلکە بەکار دەهێنێ، نەک ناوەستێ پێش ئەوەی بچێتە فلکەوە، بەڵکو کە یو تێرن بکا بازنەی فلکەکە بەکار ناهێنێ، یەکسەر لە جیاکەرەوەی نێوان دوو سایدەییەکە Splitter Island پێچ دەکاتەوە!

03/10/2023

نەبوونی هەڵە لە پێوانەکاریدا!

بە حوكمی کاری زۆرمان لە کایەی ڕووپێوی، وە بۆ فەرمانگە حکومییەکان و کۆمپانیاکان، توشی دوو داواکاریی سەیر و دژ بە یەک دەبین.

لە فەرمانگە حکومییەکان، کە بووە بە باو بە سیستمی UTM کار دەکەن، کاتێ پێیان دەڵێیت ئەو سیستمە شێواندنی تا ٥٠ سم/کم دەڕوات و شیاونییە بۆ کاری نەخشەسازی و دیزاین، گوێی پێ نادەن و لایان ئاساییە ئەو هەڵە زۆرە هەبێت، لە کاتێکدا کاریگەرییەکەی لەسەر نەخشەی شارەکان و تێکەڵبوونی سنورەکان و دروستکردنی سەدان کێشە زۆر زەقە!

لەولاشەوە، کاتێ ڕووپێوی کۆمپانیاکان داوای تۆڕی کۆنترۆڵ پۆینتی دەقیق دەکەن و بۆیان دادەنێیت و کاری لەسەر دەکەن، دەڵێن چەند ملیمێک هەڵە هەیە و قبوڵ نییە بۆمان (سفر) بکەنەوە!

چ گوێنەدان بە هەڵەی تا ئاستی ٥٠ سم لە کیلۆمەترێکدا و چ داواکاری بۆ بنبڕکردنی هەڵە، وەک یەکن و نازانستین. بەهۆی پێشکەوتنی تەکنیکەکانی پێوانەکارییەوە ئەو وێنا هەڵەیە دروست بووە کە ئیتر هەڵە بە تەواوی بنبڕ ئەبێ. لە کاتێکدا سەرچاوی هەڵە تەنها ئامێر نییە، بەڵکو ژینگە و کارپێکەر دوو سەرچاوەی تری هەڵەن و هەر دەمێنن، هیچ براندێکیش بانگەشەی ئەوە ناکات هەڵەی لە ئامێرەکاندا بنبڕ کردبێت.

جا بۆ خۆی لە ئامێرەکانیشدا یەک سەرچاوی هەڵەت نییە، بە نمونە کاتێ تۆتاڵ ستەیشن بەکار دەهێنیت، کە خۆی سێ سەرچاوەی هەڵەی تیایە (گۆشەکان، دووری، سەنتەرینگ)، لە هەمان کاتدا سێپا و پۆڵی ریفلێکتەر و ریفلێکتەر زۆر جار هەڵەی زۆر گەورەتر دروست دەکەن.

لەم لینکەوە لە جۆرە جیاوازەکانی ریفلێکتەری لایکا بڕوانە، کە هەمان شەریکەن و چەند جیاوازن لە پێوانەکاری، وە چۆن تەنها لە ریفلێکتەرێکدا ئەو هەموو سەرچاوەی هەڵەیە هەن و هەرگیز بنبڕ نابن، بەڵام دەکرێ کەم بکرێنەوە تا ئاستێکی زۆر باش. باشترین ریفلێکتەری لایکا GPH1P یە کە هەڵەی سەنتەرینگی 0.3 ملم ە، ئەوانی تر کە باوە بۆ کاری دابەزاندن (مینی ریفلێکتەر و 360) هەڵەی سەنتەرینگیان ٢ ملم ە! ئەمە بێ لەوەی کە دەکرێ پۆڵی ریفلێکتەر تەواو رێک نەبێ، یاخود بەبڵی رۆشتبێ (کە ئەمەیان زۆر ڕوو ئەدات و هەڵەی زۆر گەورە دروست ئەکات و ئەبێ بەردەوام کالیبرەیشنی بۆ بکرێ).

ئەگەر گریمانی ئەوە بکەین کە ئامیرێک هەیە هەموو ئەم هەڵانەی بنبڕ کردووە، ئەی چۆن هەڵەی ڕێگاکانی پێوانەکاری بنبڕ ئەکەیت؟ ئەوەی باوە کاری پێدەکرێ فری ستەیشنە، کە هەرگیز بۆ پێوانەکاریی زۆر ورد دەستنادات. زۆر جار ئەو ڕێگایە خەڵەتێنەرە، کاتێ لە شوێنێکەوە کۆمەڵێ خاڵ دادەنێیت و دواتر هەر لەو شوێنەوە یا نزیک لەو وێستگەیە بە فری ستەشین وەریان دەگریتەوە، بڕی هەڵەی نزیک لە سفرت نیشان دەدەن، چونکە لە دۆخێکدایت سەرچاوەکانی هەڵە هەمان شتن. بەڵام هەر ئەو خاڵەنە لە جێیەکی کەمێ دوورتر وەرگرەوە، کە دووبارە سێتی ئامیر و گۆڕان و سوڕانی ریفلێکتەر و ئاراستەی جیاوازی بەبڵکردنی تێبکەوێ، دەبینی هەڵەکە چەند زیاد دەکات، ئەمە تەنانەت بۆ پێگەیەکی بچوک. لە پێگەی کاری گەورە کە گواستنەوەی ئامێری زۆری تێبکەوێ هێندە ‌هەڵەکە زۆر دەبێت تەسەوری نەکەیت.

باشترین ڕیگەی پێوانەکاری بریتییە لە سێلاکاری Trilateration گەر بە ئامێری تۆتاڵی زۆر باش و هەروەها هۆڵدەر و تراتبراخ و ریفلێکتەری پرۆفیشناڵی ٥٠٠٠ بکرێت، کە ڕیگەیەکی ئاڵۆز و نارەحەت و دەبێت حیساب بۆ شێوەی سێگۆشەکان بکەیت لە پێوانەکاری، پاشان لە حیسابکردنا strength of figure لەبەرچاو بگریت و لەهەموشی ئاڵۆزتر دابەشکردنەوەی هەڵەیە. ئێمە ئەم ڕیگەیە تەنها بۆ دروستکردنی سیستمی پۆوتان بەکار دەهێنین.

پاشان با گریمانێکی تریش بکەین: براندێک توانیی ئامێر دروست بکات بە هەڵەی سفر، کەشی پێوانەکاری زۆر ستاندارد و نەگۆڕە، وە توانای کەسەکە و ڕێگاکانی پێوانەکاری هەڵەی تیا نییە، ئەم (سفر) ی هەڵەیە سودی چییە؟ خۆ ئاوێنەی پێوانەکاریی ئەتۆمی لەسەر دانانێیت، بۆ کاری بینا و قاڵب بەستنە کە دەبێت زۆر شوکور بیت گەر ستافێکی هێندە وردپێوت هەبێت بتوانن ١ سم کۆنترۆڵ بکەن (هەرچەند زۆرێک لەوانەش بانگەشەی سفر ئەکەن!).

21/05/2023

دیاردەیەکی سەیر

بارانەکەی دوێنێ لە ماوەی ٢٤ کاتژمێردا ١٦ ملم بوو (لە ١٢ی شەوی پێشوو تا ١٢ ی ئەمشەو)، بەڵام تاوی باران بۆ ٥ خولەکی و ١٠ خولەکی زۆر زیاتر بوو لە دوو شەپۆلی بەهێزی بارانی پێشوو (٨-٣ و ١٢-٤).

لە شەپۆلە بارانی ٨-٣-٢٠٢٣ تاوی ٥ خولەکی ٥٠ ملم/کاتژمێر و تاوی ١٠ خولەکی ٤٥ ملم/کاتژمێر بوون. لە کاتێکدا کۆی بارانی ٢٤ کاتژمێری زیاتر بوو لە ٩٠ ملم.

لە شەپۆلی بارانی ١٢-٤-٢٠٢٣ تاوی ٥ خولەکی ٦٠ ملم/کاتژمێر و تاوی ١٠ خولەکی ٣٨ ملم/کاتژمێر بوون. کۆی بارانی ٢٤ کاتژمێر نزیکەی ٦٥ ملم بوو.

لەو بارانەی دوێنێ کە تەنها ١٦ ملم باریوە لە ٢٤ کاتژمێردا، تاوی بارانی ٥ خولەکی ٨٩ ملم/کاتژمێر و تاوی بارانی ١٠ خولەکی ٥٥ ملم/کاتژمێر بوون! بەڵام لە ١٥ خولەکییا دێتە خوار ٤٠، کە بارانی مانگی ٣ لەوەدا زیاتر بوو.

بارانی وەرزی گەرما وایە، بە کۆمەڵێک هۆکار لە ماوەیەکی زۆر کەمدا ئەوەی هەیە بە تاو دائەبارێ، لەکاتێکدا لە وەرزی ساردا لەسەرخۆ و درێژخایەنە. هەربۆیە بەکارهێنانی هاوکێشەی ولاتانی کەمەری، یا وڵاتانی گەرم بە گشتی، بۆ وردکردنەوەی بارانی ٢٤ کاتژمێری بۆ چەند خولەکی ڕاست نییە و هەڵەی گەورە دروست ئەکات.

پێم وابێ لافاوی ساڵی ٨٧ ی شاری سلێمانی هەر لە سەرەتای مانگی ٥ دا بووە.

07/05/2023

وەڵامی پرسیاری پۆستی پێشوو

مەبەست لە پرسیارەکە دروستبوونی جیاوازی لە بەرزییا نەبوو، بەڵکو جیاوازی لە دووری distance لە نێوان خاڵی A و B، لە کاتێکدا جیاوازیی بەرزیی نێوانیان زۆرە. ئەڵبەت باسی ئەوەشم کردبوو کە پێوانەکە زۆر ورد بێت، یانی هەڵەی ئامێر و هەڵە بەهۆی کەشەوە (پەستان و پلەی گەرما و ڕادەی شێ) بنبڕ کرا بن.

لێرەدا کاتێ ئامێرەکە لەسەر خاڵی A یە و ریفلێکتەر لەسەر خاڵی B و پاشان پێچەوانە ئەبێتەوە (ئامێر لەسەر خاڵی B و ریفلێکتەر لەسەر خاڵی A)، لە هەردوو حاڵەتەکەدا دووریی لار slope distance وەک یەک دەرئەچێت. خۆ گەر قاچ و ترایبراخ نەجوڵێت (هۆڵدەر و تۆتاڵ ستەیشن بێ تریبراخ بجوڵێن)، لەو دۆخەیا هەڵەی سەنتەرینگ سفر ئەبێت.

کاریگەرییەکە گۆییبوونی زەوی دروستی ئەکات، کە لە دوورکەوتنەوەیا بەرچاوە کار ئەکاتە سەر پێوانەی گۆشەی ستونی (α)، چونکە لێکەوتی ئاسۆیی لە خاڵی A و B تەریب نابن و بە ئەندازەی گۆشەی دروستبوو لە چەقی زەوی جیاواز دەبن و لەگەڵ هێڵی پێوانە یەک گۆشە نابن. لە دۆخی ڕوو لە بەرزی، دووری زیاتر دەرئەچێت لە دووریی راستی و لە دۆخی ڕوو لە نزمایی، کەمتر دەرئەچێت.

لە زۆر جێی شاری سلێمانی لێژی دەگاتە سەروو ٢٠٪، واتا tan α دەکاتە 0.2
گەر دووریی نێوان دوو خاڵەکە 500 م بێت و نیوەتیرەی زەویش 6371000 م، لەو حاڵەیا δ نزیکەی 8 ملم دەرئەچێت (کە بڕێکی بەرچاو و زۆرە بۆ پێوانەی ورد). ئەڵبەت جیاوازییەکی تریش دروست ئەبێت بەهۆی جیاوازیی ئاستی ئەو دوو خاڵە. کاتێ خاڵی B ١٠٠ م بەرزترە لە خاڵی A، لەو دۆخەیا جیاوازیی دووریی بەهۆی گۆڕینی ئاست (داتم) لە چاو بەرەنجامی بەرزیی نێوان دوو خاڵەکە دەکاتە نزیکەی ٤ ملم.

لە پێوانەکارییا حیساب کردن بۆ ئەم هەموو جیاوازییە و لەبەرچاوگرتنی ئەوەی بەرز دەبیتەوە یا نزم، ئاڵۆزە و ئەگەری هەڵەکردن بەرز دەکاتەوە. بۆیە لەبری بەکارهێنانی هاوکێشە بۆ ڕێککردنەوە، باشترین ڕێگە ئەوەیە لە تراڤەرس یا سێگۆشەکاری بەکار دێ، کە جگە لە فەیسی چەپ و ڕاست، جارێکی تر لە ئاراستەی دووەمەوە پێوانەکاری ئەکرێ (لە A بۆ B و پاشان لە B بۆ A). بەم جۆرە کاتێ بەرەنجام وەردەگریت هەموو ئەم جیاوازییانە بنبڕ دەبن.

کاتێ ڕووپێوی بە ڕیسێکشن و فریستەیشن دەکەیت لەبری تراڤەرس و سێگۆشەکاری، ئەم هەڵانە بنبڕ نابن و لە ئەگەری بوونی گواستنەوەی زۆر بڕی هەڵە زۆر زیاد ئەکات.

زۆر کەس جاری وایە ئەو پرسیارە دەکەن: ئایا گۆیی بوونی زەوی ئەوەندە زۆرە بە ئامێر هەستی پێ بکەی (بێ ئەوەی بچیت لەگەڵ ناسا سواری مانگی دەستکرد بیت 😃)، بەڵێ بە ئامێری ورد و ڕێگەی وردەکار دەتوانی بەم جۆرە لە چەندین جێی جیاواز تاقی کردنەوە بکەیت و ڕاستی و دروستیی یاساکان پشتڕاست بکەیتەوە.

06/05/2023

پرسیار:

کاتێ تۆتاڵ ستەیشن بەکار ئەهێنیت بۆ پێوانەی دووری زۆر بە وردی (ریفلێکتەر لەسەر هۆڵدەر و ترایبراخ دائەنرێ لەبری پۆڵ)، وە جگە لەوەی بە دوو فەیس پێوانە ئەکەیت (چەند جارێکیش دووبارە ئەکرێتەوە)، پێوانەی پێچەوانە ئەنجام دەدەیت (تۆتاڵ دەبەیتە جێی ڕیفلێکتەر و ڕیفلێکتەر بۆ جێی تۆتاڵ)، کە تێبینیی پێوانەکان دەکەیت، لە بوونی جیاوازیی بەرزیی زۆر جیاوازی دەکەوێتە دووریی پێوانەکراو کاتێ شوێن پێچەوانە ئەکرێتەوە. بەڵام کاتێ جیاوازیی بەرزیی نێوان دوو خاڵەکە کەمە، ئەم جیاوازییە لە دووری distance دروست نابێت. لە شاری سلێمانی بەهۆی بوونی لێژیی زۆر، ئەم جیاوازییە زۆر بەرچاوە و کار دەکاتە سەر پێوانەکاریی ورد.

هۆکار چییە ئەم جیاوازییە دروست ئەبێت و بە چ هاوکێشەیەک ڕێکی دەکەیتەوە؟

14/04/2023

دانانی تۆڕی کۆنترۆڵ پۆینتی نوێ بۆ شاری سلێمانی لەلایەن کۆمپانیای جیۆدیزاینەوە

ئەڵبەت شاری سلێمانی پێشتر کۆنترۆڵ پۆینتی بۆ دانراوە، بەڵام چەند گرفتێکی هەیە:

١- ڕووبەرێکی کەمی ماستەرپلانی سلێمانی دەگرێتەوە
٢- دیار نییە چۆن پێوانەکاریی بۆ کراوە و دیقەکەی لە چ ئاستێکدایا
٣- لە هەمووی پڕکێشەتر: بە سیستمی یو تی ئێم دانراوە، کە زۆرترین شێواندنی تیایە (بە گشتی ٥٠ سم/کیلۆمەتر).

لەم تۆڕە نوێیەدا، وەک دەبینن، بەشێوەیەکی پێکداچوو و ئاڵۆز پێوانەکان کراون، وە بە ئامێری جی پی ئێسی GS18، بە ڕێگەی ستاتیک و کاتی خوێندنەوەکانیش بەپێی ستاندارد (کە بە پێی درێژیی هێڵە بنەماییەکان دەگۆڕێت). پاشان لە بەرنامەی لایکا ئینفینیتییەوە هەموو سیگناڵە خراپەکان لابراون و ئەمجا پۆست پرۆسێس کراون. پاش پۆست پرۆسێس، بە 3D Adjustment کۆی تۆڕەکە پرۆسێس کراوە و هەموو ئەو هێڵانەی دیقەیان لاواز بووە تەرک کراون و چەند بارە پرۆسێس کراوەوەتەوە، تا ئەوەی F-test value کەمترکراوتەوە لە Critical F-value.

پاش دڵنیایی لە دیقەی تۆڕەکە، ئەوجا لەبری یو تی ئێم سیستمێکی تایبەت بە شاری سلێمانی دروست کراوە، کە کەمترین شێواندن دروست دەکات. لە جۆری جێکەوتەکان Transverse Mercator بەکار هاتووە، بەهۆی ئەوەی نەخشەی شارەکە زیاتر بە ئاراستەی باکور-باشورە، هەروەها دواتر گۆڕینی داتاکانی ئێستا کە یو تی ئێمن، بۆ سەر ئەم سیستمە ئاسانتر ئەبێت. بەرزیی ڕووتەختەکەش لە ڕووی ئیلپسۆیدی WGS84 ەوە دانەنراوە، بەڵکو ٨٠٠ م بەرز کراوەتەوە بۆ ئەوەی شێواندن بەهۆکاری بەرزی (کە لە ١٠٠٠ مەتر بەرزییا نزیکەی ١٦سم/کیلۆمەتر دەبێت) کەم بێتەوە. ئەڵبەت لە شاری سلێمانییا بەرزیی تۆپۆگرافی لە ٦٥٠ تا ١١٥٠ دەگۆڕێت، بۆیە هەرگیز ناتوانرێ بەرزییەک جێگیر بکرێ شێواندن نزیک لە سفر بکاتەوە. بەرزیی ٨٠٠ وا دەکات کە لە نێوان ٦٧٥ بۆ ٩٢٥ شێواندن لە ٢ سم/کم تێپەر نەکات، ئەمەش وا دەکات بێ دەستکاری بۆ هەموو جۆرە ڕووپێوییەک و پرۆژەیەکی شارسازی بەکار بێت. هەرچی جێگە بەرزەکان یا نزمەکانە (کە نزمەکان کەمن) دەبێت مامەڵەی تایبەت بکرێن.

ئەم پێوانەکارییە تەنها بۆ سیستمی ئاسۆییە. بۆ سیستمی بەرزی دەبێت بە لێڤڵینگ دابنرێ. کۆنترۆڵ پۆینتەکانی کە ئێستا هەن بە لێڤڵینگ بەرزییان دۆزراوەتەوە، هەر ئەوانە دەکرێنەوە بە بنەما بۆ تەواوکاریی کۆی سیستمەکە.

پرسیاری ئەوەی ئایا ئەمە دەکەوێتە بەردەست بۆ هەمووان: وەک کۆمپانیای جیۆدیزاین ئەم سیستمە بۆ کارەکانی خۆمان بەکار دەهێنین، هەروەها نرخی کۆنترۆڵ پۆینتەکان و سیستمەکە بە خۆبەخشی دەدرێت بە شارەوانیی سلێمانی و هەوڵ دەدەین میکانیزمێ بدۆزینەوە کە ببێتە جێگرەوەی سیستمە کۆنەکە. گەر ئەوە کرا ئەو کات بۆ گشت بەردەست ئەبێت، کە حەتمەن پێویستیی بە ڕاهێنان و زانیاری گۆڕینەوە دەبێت. بیر لەوەش دەکەینەوە لە داهاتوودا سیستمی کۆرس دابنێن و بە بەرنامەی سپایدەر کۆی ئاڵۆزییەکان چارەسەر بکرێن و ڕووپێوەکان بتوانن بە ئاسانی و بە دقەی بەرز کارەکانیان بکەن.

تێبینی: ئەوەی نیشاندراوە پۆینتە سەرەکییەکانن، کە ١٦ دانەن. دواتر لاوەکییەکانیش خوێندارونەتەوە بە ڕێگەی بەیس لاین.

13/04/2023

تینی بارانی دوێنێ شەو بۆ ماوەی ٥ و ١٠ و ١٥ خولەکی

لە کاتژمێر ٩ ی شەو بە دواوە بۆ ئەم سێ ماوە دیاریکراوە تین intensity* بەو جۆرە بوو کە لە وێنەکان دیارن.

بارانی ماوە ٥ خولەکی تینەکەی ٦٠ ملم/کاتژمێر
بارانی ماوە ١٠ خولەکی: ٣٨ ملم/کاتژمێر
بارانی ماوە ١٥ خولەکی: ٢٩ ملم/ کاتژمێر

بۆ بارانی ماوە ٢٠ خولەک و بۆ سەرەوە لە کاتژمێر ١٠ بە دواوەن، واتا ناکەونە هەمان مەوداوە.

بەراورد بە بارانی ٨ و ٩ ی مانگی ٣، تینی ٥ خولەکی لەم بارانەیا زیاتر بوو، هەستمان پێی دەکرد چەندین گوژمی کورتی یەک لە دوای یەک دەهاتن. تینی ٥ خولەکیی بارانی پێشوو ٥٠ ملم/کاتژمێر بوو. بەڵام ١٠ خولەکی ٤٥ ملم/کاتژمێر و ١٥ خولەکی ٤٢ ملم/کاتژمێر بوون. هەرچی بۆ بارانی ماوە ٦٠ خولەکییە هەردوکیان وەک یەکن (٢٠ ملم/کاتژمێر).

* بەرامبەر زاراوەی intensity لە کوردییا چڕی و تین و تاو توندی هەیە. پێشتر چڕیم بەکار دەبرد، بەڵام چڕی زیاتر بۆ density گونجاوە (بارستایی بە پێی قەبارە). بۆ پێوانی هێزی باران تین یان تاو گەنجاوترە. بە ڕای ئێوە چ زاراوەیەک گونجاوترینە؟

GeoDesign Company

25/03/2025

18/11/2024

08/11/2024

28/09/2024

18/08/2024

19/06/2024

15/05/2024

14/12/2023

03/10/2023

21/05/2023

07/05/2023

06/05/2023

14/04/2023

13/04/2023

Address

Opening Hours

Telephone

Website

Alerts

Contact The Business

Shortcuts

Share

Category

Monday	08:30 - 18:00
Tuesday	08:30 - 18:00
Wednesday	08:30 - 18:00
Thursday	08:30 - 18:00
Saturday	08:30 - 18:00
Sunday	08:30 - 18:00