02/09/2026
🍰 Anna餅屋——幾十年如一日
我自己由2006年開始食 Anna餅屋，到今年啱啱好20年。對我嚟講，呢20年真係幾乎冇變過——蛋糕個樣差唔多、包裝差唔多，最重要係味道都冇變，依然咁好食。但其實我食咗20年，只係佢歷史嘅一部分。Anna餅屋喺大溫哥華已經有接近50年歷史，幾十年嚟都係保持住嗰種傳統風格。
不過時代真係唔同咗。而家好多人買一件產品，已經唔單止睇本身好唔好。要個樣靚、包裝靚、宣傳吸引，最好仲要影相出嚟夠搶眼。慢慢大家可能會忘記，原來有啲最好食嘅蛋糕，未必有最靚嘅包裝，亦未必有最潮嘅外形。Anna嘅味道冇變，變嘅可能係市場。
🔧 其實工具界都一樣。
市面上有好多老牌工具，幾十年設計都冇乜變。質量可能一直都非常好，甚至以前係行業中數一數二，但包裝老土、外形唔搶眼、Marketing又唔夠人強，慢慢就由一線退到二線，甚至被新一代遺忘。
相反，有啲新品牌未必質量一定比老牌子好，但勝在識設計、識包裝、識宣傳，產品又不斷有新嘢，自然慢慢搶到市場。當然，亦有一啲老品牌做得到兩樣嘢：守住原本嘅質量，同時加入新血、新設計、新思維。 呢啲品牌反而可以一代一代繼續行落去。
其實而家香港工具界都開始見到呢個轉變。多咗一班後生嘅工具店、買家同業界人士，開始周圍搵一啲靚嘅、新嘅、特別嘅，同時真正好用嘅工具返香港，慢慢改變以前十年廿年都係賣同一批貨、用同一套方法嘅市場。質量永遠係根基，但有好嘅產品，都要識得令人重新睇見佢。
蛋糕係咁，工具係咁，其實好多行業都係咁。
華錫家居五金 / U-Tools Home Hardware
