20/07/2022
"هو إيه المحارة دي أصلاً !!"
كلنا عارفين البنت اللي في الاعلان ده ..
بس فيه فعلاً ناس متعرفش (يعني ايه المحارة !!) 😅
فـ تعالى هنا بقى في البوست ده ببساطة وباختصار شديد جداً جداً اقولك ايه هي (المحارة) .. وهـ نتكلم عن (ايه هي اهم حاجة لازم اخد بالي منها) وانا بستلمها
في الأول .. خلينا نقول ان المحارة هي من أهم خطوات مراحل تشطيب الشقة .. وهي تعتبر اول واهم خطوة في عملية التشطيب بالشكل والملمس والديكور المطلوب .. وكمان تقدر بيها تعالج اي ميول أو اعوجاج في الحائط .. من الآخر .. لو ظبطتها .. هتريحك في 70 ٪ من الشغل اللي جاي 😉
اول خطوة بقى قبل ما نبدأ شغل هي اننا لازم نرش مياه ع الحوائط اللي هيتعمل لها محارة كويس قبل الشغل علشان اغسلها من اي املاح موجودة عليها .. وكمان علشان الطوب يكون رطب وميشربش مياه المونة بتاعتنا واللي ممكن لو حصل ساعتها يحصل تشريخ او تنسيم بعد فترة
بعد كده نبدأ نعمل حاجة اسمها (طرطشة) على الحوائط وعلى كل حاجة هتتمحر .. الطرطشة دي هي عبارة عن مونة بس تقيلة شوية - يعني فيها محتوى اسمنت اكتر ورمل اخشن شوية - وبترميها على الحوائط بهدف انها تكون خشنة وجاهزة لاستقبال الخطوة اللي بعدها
الخطوة اللي بعدها بقى مهمة جداً جداً جداً ومينفعش تستلم شغلك من غيرها او تستهون بيها .. وهي اننا نحط شبك سلك (فايبر او معدن) على كل الفواصل بين الطوب والخرسانة (سواء عمود او كمرة) وده علشان نمنع ان يحصل اي شروخ بعد كده بسبب اختلاف معامل التمدد .. وكمان بنحطها عند زوايا فتحات الأبواب والشبابيك علشان نتجنب التنسيم المشهووور جدا في المنطقة دي
نيحي بقى للخطوة الأخيرة وهي خطوة المحارة نفسها واللي ممكن ننفذها بـ 4 طرق مختلفين في دقتهم وتكلفتهم وخطواتهم .. لكنهم متفقين في كل الخطوات اللي فاتت دي .. وهما بترتيب تنازلي من حيث الدقة والتكلفة :
1. المحارة بطريقة التأكيس والترابيع
2. المحارة بطريقة البؤج والأوتار
3. المحارة بطريقة البؤج
4. المحارة البلدي
وهنبقى نتكلم عليهم بالتفصيل الممل في بوست لواحده
ولكن المهم بقى .. ايه لازم اخد بالي منه .. وايه ضروري اتجنبه في أثناء تنفيذ واستلام شغل المحارة ؟!
1. ممنوع منعاً باتاً استخدام الجبس في اي خطوة من خطوات المحارة .. لانه بيمتص الرطولة وبعد فترة بينتفش ويفرقع
2. مهم جدا متنساش خطوة الشبك السلك .. ويفضل انها تكون بعد خطوة الطرطشة علشان نضمن ان تحتها مونة خشنة
3. وانت بتستلم الطرطشة خليك حريص انها تكون خشنة علشان تقدر تشد وتمسك في مونة المحارة بعدها .. خشنة وكأنها هتعورك
وفي الآخر
خلينا نقول ان كل 100 م2 محارة للحوائط بيحتاج كـ متوسط
(1.20 طن أسمنت + 3.25 رمل) وده تقريبياً في الحالات القياسية
وبكده لو حصلك الموقف ده ..
ولقيتها بتسألك "هو إيه المحارة دي أصلاً !!"
تقدر ترد عليها وتشرحهالها .. ومحدش يضحك عليك 😉😎
-------------------------------------------
لو عندك معلومة.. شاركنا بيها واكتبهالنا فوراً ومتتأخرش ☺️
ولو عندك أي استفسار .. ابعتلنا واحنا نساعدك ومتقلقش ☺️
وتابعنا .. هتعرف أكتر
😉
Whatsapp : 01023412757
👌
