08/02/2025
أعمال التشطيبات: مرحلة التجهيزات
مرحلة التجهيزات هي الأساس الحقيقي لأي تشطيب ناجح، ورغم أنها تبدو فوضوية أحيانًا، إلا أن دقتها بتحدد جودة التشطيبات النهائية. أي خطأ فيها ممكن يكلفك وقت ومجهود وفلوس في مراحل لاحقة. في المقال ده، هنتكلم عن أهم الخطوات اللي تضمن لك شغل مضبوط من البداية.
1. التعديلات المعمارية (التكسير والبناء)
قبل ما تبدأ، لازم تراجع التصميم الداخلي وتشوف لو فيه أي تعديلات زي:
فتح أو غلق حوائط لتعديل المساحات.
تعديل فتحات الأبواب والشبابيك حسب الحاجة.
التعديلات دي لازم تتعمل بحرص عشان ما تأثرش على الهيكل الإنشائي، وكمان لازم تلتزم بالشكل المعماري للواجهة لأنها بتكون معتمدة في الرخصة، ومش من حقك تعدّلها بدون تصريح رسمي.
2. تأسيس السباكة والكهرباء و الحلوق
دي مرحلة حساسة، ولو عندك تصميم مسبق للسباكة والكهرباء، لازم تنفذه زي ما هو. إنما لو المخطط بس معماري، فإما المهندس المشرف يحدد المسارات، أو هتحتاج تنسق مع السباك والكهربائي بنفسك وتفهم كل واحد منهم محتاج إيه عشان ما يبقاش فيه تعارض بينهم ، و طبعا الخامات في تأسيس السباكه الكهرباء أهم من التشطيب.
نقطة مهمة: تأسيس السباكة والكهرباء و الحلوق بيتحدد على بؤج المحارة، و منسوب الأرضية بيتحدد من السباك فلازم البؤج و منسوب الارضية تكون متظبطة الأول عشان تضمن إن الشغل يطلع مضبوط .
3. المحارة والعزل
المحارة بتضمن استواء الحوائط قبل الدهانات أو التركيب ولازم نهتم بيه ونتاكد من جودته و إستلامه مظبوط.
العزل مهم في الحمامات والمطابخ والأسطح، عشان تضمن الحفاظ على المنشأ و باقي بنود التشطيب و لازم نختبره عشان نتأكد من جودته.
4. تجهيز مناسيب الأرضيات وفتحات التكييف والسخانات
تحديد مستوى الأرضيات قبل التأسيس مهم عشان ما يحصلش تضارب في المواسير.
لو فيه تكييفات سبليت أو سخانات غاز، لازم توصل لها المواسير والتوصيلات من البداية.
لو فيه بلكونات أو أسطح مفتوحة، لازم تجهيز صرف المطر قبل العزل.
الاهتمام بالتفاصيل دي و بنوعية الخامات و جودة التنفيذ بيوفر عليك مشاكل كبيرة في المستقبل و أهم من التشطيب، وبيخليك تكمل تشطيب وأنت مرتاح.
Enjaz - إنجاز
