23/12/2025
ملايين المصريين تابعوا زيارة وزير البترول الاخيرة لمنجم السكري و التغطية الاعلامية الواسعة للزيارة و تفاصيل العمل الجبار هناك
انبهار وفود الاعلام و الوزير نفسه و قبلهم رئيس الوزراء بحجم العمل و التكنولوجيا و الانجاز
مش من فراغ .. لكن وراه رحلة كفاح عمرها اكتر من 30 سنة من لحظة ما وصل الجيولوجي العالمي / سامي الراجحي مصر و بدأ فى استكشاف منطقة السكري علشان يصنع ملحمة اسمها منجم السكري
الوزير بنفسه قال التعدين محتاج بنية اساسية قوية و مصادر طاقة و بيئة تشريعية محفزة
لكن سامي الراجحي اكتشف و بني و ادار منجم السكري فى وقت مرسي علم مكانتش مدينة اساسا ولا فيها طرق ولا مطار و لا طاقة و فى ظل بيئة تشريعية طاردة لأى استثمار بتجبر المستثمر على مشاركة الدولة فى المشروع و هو لوحده اللى يتحمل جميع تكاليف الاستكشاف و التنمية
ال 10 مليار دولار استثمارات و مبيعات اللى دخلوا الاقتصاد المصري ( لغاية دلوقت ) و معاهم 4500 اسرة و اكتر من 1000 مورد و شركة بتشتغل فى المنجم ده غير العلم و التكنولوجيا اللى لاول مرة تدخل منطقة الشرق الاوسط .. دى ابسط حاجة قدمها سامي الراجحي لبلده .. لكن الاهم من ده انه خلى رواد الاستثمار التعديني فى العالم كله نظرتهم تتغير لمصر بعد ما كانوا رافضين مجرد التفكير فى الاستثمار فيها وكانت السمعة فى العالم كله ان مصر مفيهاش احتمالات لاكتشاف مناجم كبيرة اقتصادية و ان الدهب انتهي من ارضها من عصر الفراعنة
و رغم كده هو قبل انه يستثمر فى ظل المناخ ده و اتقال له من المسؤلين وقتها " واثقين فى وطنيتك و مستنيين منك تخلق قصة نجاح نقدر بيها نغير للافضل "
و بالفعل .. مبخلش بعلمه ولا بخبرته ولا بفلوسه .. علشان يتحقق الانجاز ده
بلا اى مبالغة .. كلمات الشكر تعجز عن اننا نوفى باعث النهضة التعدينية فى مصر بعد عقود من الموت .. حقه
لكن رغم كده شكرا للعالم العظيم / سامي الراجحي
