29/08/2019
هقولك شوية نصايح تحافظ بيهم على موتور عربيتك
1 – زيت الموتور ..
لو بتحط زيت 5 الاف يبقى الأفضل تغيرة عند 4500 و 4 الاف كمان
لو بتحط 10 الاف يبقى الافضل كل 9 الاف تغيرة
لو مسافرة سفرية جامدة بالعربية فوق ال 450 كيلو رايح و 450 كيلو جى
و لسة فاضل على الزيت اللى معاك الف كيلو او الف نص … سقطة و حط زيت جديد و سافر بالعربية
2 – زيت الفتيس اللى تقريبا 3/4 الشعب المصرى مش بيفكر فية … و ماشيين ورا كلام الراجل صاحب الافتكاسة اللى بتقول
زيت الفتيس بيتزود مش بينقص …
يا جماعة زيت الفتيس عادى بيفقد خواصة ذى اى سائل و بيتحرق و لزوجتة و اداء مهمتة بتقل
ياريت كل 45 – 50 الف كيلو تغير زيت الفتيس بالمصفى بتاعتة
3 – البوجيهات … مش لازم البوجية يتاكل او يبوظ او سحب العربية يضعف عشان تروح تغيرة
كل 18 – 20 الف هات طقم بوجيهات جديد
4 – عارف لو مدورتش العربية علطول و طلعت بيها
و الله هتفرق فى اداء الموتور جامد
سخن العربية لمدة دقيقة و بعد كدة اطلع بيها
5 – فلتر البنزين … وظيفتة انة ينقى البنزين من الشوايب اللى فية عشان البنزين يكون نضيف على قد ما يقدر و هو داخل على الموتور طبعا لو انت مش بتغيرة و مش مهتم بالفلتر دة …
البنزين بيخش بقرفة على الموتور و السحب هيقل و يضعف و العربية هتشرب بنزين كتير الفلتر ب 250 جنية
مش هيحصل حاجة لو غيرتة كل 10 الاف كيلو
6 – فلتر الزيت نفس الكلام و نفس الوظيفة بتاعت فلتر البنزين بس دة بينقى الزيت مش البنزين
مفهاش حاجة لما تغيرة برضة كل 10 الاف كيلو
7 – فلتر الهوا .. غيرة كل 15 الف
8 – البوابة … بوابة الهوا او الثروتل ..
فكها كل 10 الاف كيلو و نضفها كويس و ركبها تانى
9 – اهتم بالطنابير و اتيال الفرامل و خليهم ديما ب احسن حالة .. عشان كل لما الفرامل يكون ادائها كويس كل لما هيكون الحمل على الموتور أخف
10 – بلاش تحرق على الغيارات …
11 – بلاش لعب كتير بالعربية عشان بيزعل كل حاجة فيها
لو عملت كل دة هتطول فى عمر موتورك جامد
