04/11/2024
مساء النور
بند الجيبسوم بورد من اكتر البنود اللي بيحصل فيها مشاكل
خلينا نبدأ ليه اصلا بنعمل جيبسوم بورد ؟
فهو لسببين الأول أننا نداري عيوب الاسقف والتاني أننا نقدر نوزع الاضاءات براحتنا
تاني حاجه ايه البراندات الموجوده في الجيبسوم بورد ؟
فهو عندنا 2 براند هما اللي واكلين السوق المصري حاليا وهما كناوف وجي بورد
طبعا كناوف أعلى من چي بورد -- واغلى في السعر
عندنا كمان في صاج الجيبسوم بورد قطاعات وطبعا اكتر واحد مستخدم هو ال0.4 ودي من الحاجات اللي بيحصل فيها لعب من المقاولين يجيبلك قطاع 35 ويحاسبك على أنه 0.4 😁
عندنا انواع كمان من ألواح الجيبسومبورد لوح اخضر وده بيستخدم في الحمامات عشان بيقاوم الرطوبة ولوح احمر وده بيكون في المطابخ عشان بيقاوم الحرارة ولوح ابيض وده بيكون معمول للغرف.
طريقة حساب صنايعي الجيبسوم بورد بتكون بالمتر
لو السقف فلات بيكون بالمتر المربع
لو بيت نور بيكون بالمتر الطولي وبيتضاف عليهم المرايا بتاع الجبس ودي بتكون حوالي 6 سنتي ودي بتتحسب ال2 متر منها بمتر
وركز عشان في ناس بتغفل وبتزود في الامتار 😁😁
