14/04/2025
الصدأ في حديد التسليح أو السيخ من أخطر المشاكل الممكن تخلي بيتك ينهار 🤷🏻♂️
⭕نبدا القصة دي وحدا وحدا ب أنو نجاوب على سؤال من وين بيجي الصدأ أصلا ي باشمهندس؟!🤔
👷🏼♂️: بأختصار كدا الصدأ هو تفاعل كيميائي بيحصل بين الأكسجين الموجود في الهواء والموية سوا كانت في شكل رطوبة (بخار ماء يعني) أو موية في شكلها السائل بالأضافة لي أنو تكون في أملاح, دا بأختصار شديد هو البيخلي يظهر صدأ على الحديد حق التسليح أو السيخ.
🙍🏻♂️:شنو الخطورة طيب من الصدأ ي هندسة؟
👷🏼♂️:الصدأ ي عزيزي صاحب البيت هو بمثابة سرطان داخل أعمدتك وسقفك وكمرات بيتك😶, وفي بعض الحالات لا قدر الله ممكن توصل الحالة حقت بيتك لي أنو ينهار وتخسر كل شقاء عمرك تخيل؟!!!🤦🏻♂️
🙍🏻♂️:طيب ي هندسة يعني بيعمل شنو بالضبط؟🤷🏻♂️
👷🏼♂️:أولاً الصدأ بيخلي الحديد يتأكل وحديد متأكل دا معناه أنو بقى حديد أضعف من القوة الأتصمم عشان يشيلها أو يتحملها, كأنك عملت نحت أو كشط لي قطعة خشب سليمة أكيد دا هيخليها أضعف من شكلها الأول.
👷🏼♂️: ثانياً السيخ المصدي لمن تستعملو في البناء وتصب عليو الخرسانة هيكون زي م قلنا في بداية البوست سرطان جوة بيتك, هيعمل شقوق في الأعمدة والكمرات مع الزمن وحتى سقف البيت وزي م قلنا بتوصل حد الأنهيار أحيانا, وبيقلل برضو التماسك بين السيخ والخرسانة لانو بقى في طبقة بينهم وهي طبقة الصدأ دي.
🙍🏻♂️: دا كلام خطير شديد ي باشمهندس؟!
👷🏼♂️: خطير خالص ي عزيزي المالك, بس ما تخاف أنا هاوريك شوية حاجات ممكن تعملها تخليك تتجنب المشكلة دي.
👷🏼♂️: أول شي أتجنب تماما أنك تخلي السيخ في مكان مكشوف بدون غطا حتى لو كنت في نص الصيف والشمس تلحم الحديد (بتقدر تجيب الأغطية البلاستيكية المتوفرة في المغالق دي وتغطي بيها السيخ بشكل محكم "مشمع بلاستيك")
👷🏼♂️: أتجنب برضو أنك تقفل السيخ في مخزن أو مكان ما فيو تهوية كويسة لأنو زي م قلنا فوق عنصر مهم في تفاعل الصدأ (الأكسدة) بيحصل بسبب الموية سوا رطوبة أو سائلة.
دي نقاط مهمة أذا اتبعتها أن شاء الله م هتحصل ليك مشاكل صدأ في الحديد, وأوعك زول يقول ليك تاني أنو الحديد المصدي م بيعمل شي للبيت🤣.
🙍🏻♂️: طيب ي هندسة بس أنا عندي مصدي أصلا أعمل فيو شنو؟!
👷🏼♂️: لو بتواجهك المشكلة دي وريني في التعليقات وممكن أكتب ليكم بوست كامل عنها😁✨
#مقاولات #بناء #تنفيذ
🖋️ م. حسن قطان
