25/04/2025
فيه في كل شركة ديما حد بارز علي انه بيبقي صوت الضمير لكل الناس في الشركة بداية من العمال الي المستثمرين ، ديما الناس بتنقسم عليه الي شريحتين الشريحة الاولي بتبقي مش طايقاه وحاساه بيبالغ وبيتدخل بغير داعي وبيدي الامور اكتر من حقها . والشريحة التانية بتبقي مبسوطة من وجوده وبتستشيره في حاجات كتير وقرارات في الشغل ، أسوأ ما في الموضوع لما يكون المستثمرين او الادارة العليا من الشريحة الأولى ده بيبقي معناه ان صوت الضمير بيأنبهم وبيبقي دليل علي انهم مش شايفين غير نفسهم ومصلحتهم وغالبا الحد ده مش بيكمل في الشركات اللي من النوع ده وبتستمر الشركة بعده بس بتكون زي شخص فقد ضميره او نيمه لحد ما تحصل حاجات سيئة تخليهم يفوقوا بعد فوات الأوان وبعد ما تكون خسرت كتير من سمعتها واقتصادها كمان .
ولو كانت الادارة ورؤس الاموال من الشريحة التانية اللي بتحب ان الشخص اللي بيصحي ضمير الشركة والاقسام كل ما يلاقي شرود عن المسار في اي اتجاه بتكون الشركة بالظبط زي ما الانسان يكون عايش بضمير صاحي بيبعده عن نوازع نفسه الامارة بالسوء وبيقدر يكمل حياته من غير ما يقع فريسة لحب السلطة او الطمع حتي لو كان ده علي حساب الآخرين .
حافظ علي ضمير مؤسستك لاطول وقت ممكن علشان علي الأقل لما يسيبك يكون علم اللي حواليه حاجة تخليهم يقدروا يكملوا .
