14/07/2025
فكرة ان الموظف يبقي فاكر انه علشان بيعمل دورة في الشغل مفروض يبقي شريك دا اكبر غلط ودليل علي عقليه الشخص , اظهار للي جواه ..!
-مبدأيا اي موظف بيتشغل في اي مكان عنده مهام معينه متفق عليه براتب متفق عليه .!!
حضرتك لو اشتغلت المهام دي بنسبة 100% ف دا يبقي العادي ودا
زي م العادي انك تاخد مرتبك اخر الشهر .!!
اللي مش عادي انك تبقي باصص لصاحب الشغل في مكسبه
وعايز تتحاسب بناء علي مكسب المكان .!!
-معلش هوا انت كنت دفعت في رأس المال اللي بملايين .!!
حضرتك عرفت اصلا الفلوس دي جت ازاي ولا اتحوشت ازاي .!!
هل انت لو معاك نفس الفلوس دي هتاخد المخاطره وتفتح مشروع
وتبقي مستعد للخساره قبل المكسب .!!
-طيب انت حضرت شهور التجهيز , الضغط , النصب , التعامل مع 100 صنيعي في سباق زمني علشان تعرف تفتح في الوقت اللى متحدد , ولا التاخيرات , الايجار اللي بيعد عليك حتي لو مفتحتش !!
-خليك عديت كل دا وفتحت المكان
هل انت كنت شايل علي كتفك تسويق المكان علشان يبداء يشتغل
وقعد ليالي سهران تفكر لو المشروع مشتغلش هتعرف تنجو بكمية الالتزامات اللي متعلقة في رقبتك دي لو خسرت .!!
-من اول يوم شغل ليك لو المكان محققش نجاح هترضي متخدش مرتب .!!
طيب لو المكان مشتغلش ينفع اجي استلف منك علشان اسدد الايجار , بنود التشغيل , العملة .!!
طيب الصيانات , الاعطال , تشغيل العمالة كلها حضرتك
هتسد مكان حد فيهم لو مجاش “يعني هتنضف او هتعمل صيانات او هتيجي بدل الشيفت بتاعك شيفت تاني علشان المكان يشتغل
ولو سديت هتسد كام يوم او كام شهر .!!!
لو حصل مشكلة في المكان هتنزل من بيتك بعد الشيفت او في نص الليل تحلها
ولو نزلت ممكن تكرر الموضوع دا كام مره .!!!
التعاملات الورقية , الضريبيه , التراخيص وكل المشاكل المتعلقة بالموضوع دا تعرف تتحمل مسوليتها .!!!
هتقول وانا مالي .!
في النهاية انت ك موظف بتشتغل في المكان بعد م
اتجهز بمئات الالوف , اشتغل , وقف علي رجلة , اتسوق ليه , بقي فيه ناس ..!
متعرفش اي حاجة عن اي بند من اللي ذكرتهم دول
في النهاية المشروع كسب ليك راتب , تقدير , احترام
المشروع خسر انت ملكش دعوة وهتقول انا عايز مرتبي ولو اتاخر عليك الراتب مش هتسكت ودا حقك ..
ومع اول فرصة مناسبة ليك ولا هتشغل بالك باي حاجة في المكان ودا الطبيعي ..!
-علشان كدا مهم تتعلم توزن الامور , متوهمش نفسك بصحة قصتك , تخلق جواك حقد وغل تجاه المكان اللي بتشتغل فيه
لمجرد انك بتقوم بدورك في الشغل واللي ليه مقابل مادي ومعنوي .!! 🙂
وتاكد ان كل صاحب مصلحة ربنا مسخر ليه رزقة لاسباب ربك واحده مطلع عليها
دي ارزاق ربنا اللي موزعها ف احمد ربك , طور من نفسك , خد بالاسباب والباقي علي ربنا …✋♥️
