30/08/2026
صرالنا موقف من مدة وحبيت نحكيه، خاطر بصراحة بقات هذيك الهدرة في بالي.
واحد سقسى عندنا على فلتر الهواء، جاوبناه: 2500 دج.
قالنا: «إذا Original؟»
كتبتلو: «Original…» و بعثتهالوا و باش نكمل ونقولو السومة تاعو، بصح قبل ما نكمل هدرتي قالي:
«الـOriginal يدير 7000 دج.»
ومن بعد زاد قالنا: «راجعوا السلعة تاعكم...!»
الحقيقة؟
الـ2500 دج راهي قطعة بديلة وحاجة مليحة، والـOriginal عندنا بـ4500
الربح ماشي شحال تقدر تزيد في السعر… الربح شحال تقدر تربح وتبقى مرتاح مع ضميرك
ولا لاازم نضربوك فالسومة باش تقنع روحك بلي شريت حاجة صحيحة.؟!
و فالأخير لي حب يربح العام طويل و السلام عليكم 🫡
#توضيح
العبرة من هاذ لحكاية ماشي في فلتر الهواء، وماشي في 2500 ولا 7000دج… العبرة فلإنسان كي يحكم قبل ما يسمع....
مرات تكون الحقيقة مزالت موصلتش، ونت تكون سبقتها بحكمك ومرات بضع ثواني فقط يخلوك تضيّع على روحك فرصة كنت قادر تخرج منها رابح (هذي مشي غير فالتجارة انما فكامل أمور الدنيا) … ماشي لأنو الخير خلاص ولكن لأنو قررت بلي تعرف الحقيقة قبل ما تسمعها كاملة....
إذا ما تعرفش، اسأل. إذا شكّيت، تأكد. وإذا جاك جواب، خليه يكمل قبل ما تحكم.
لأنو أسوأ الأحكام هي اللي نبنيوها على نص معلومة، وأكبر الخسائر مرات ما تجيش من سوء الاختيار… تجي من التسرّع فالاختيار
اسمع للآخر… يمكن الجملة اللي كنت حاب تقاطعها هي نفسها الجملة اللي كان فيها الخير اللي كنت تحوس عليه.👌
