25/05/2025
ټرمپ په یو نړیوال سټیج باندې وایي که دا یو ارمان مې پوره شو نور ارمان نه لرم؛
چې کاشکي د بګرام هوایي اډه مو لاسته راغلې وای.
تاسې پوهیږۍ دا اډه څومره مهمه ده؟
بګرام هوایي اډه، چې د افغانستان په پروان ولایت کې موقعیت لري، د هېواد له ستراتیژیکو او تخنیکي پلوه له خورا مهمو هوایي اډو څخه ده- دا اډه د څو لسیزو راهیسې د نظامي او لوژستیکي عملیاتو لپاره کارول شوې ده. دلته یې یو شمېر تخنیکي او انجینري ځانګړتیاوې د همدې انجینري فیسبوک پاڼې درنو ملګرو سره شریکوم تر څو د خپل ګران هیواد ددغې عظیمې برخې په اړه یو څه معلومات ولرئ.
1. جغرافیایي موقعیت
موقعیت: د کابل شمال ته شاوخوا ۶۰ کیلومتره.
ارتفاع: نږدې ۱۵۰۰ متره د سمندر له سطحې لوړه واقع ده
د ستراتیژیک موقعیت له اړخه دا ځای د منځنۍ آسیا، ایران، چین او پاکستان ته ترټولو مشترکه، لوړه او نږدې موقعیت لري.
2. رنوې (Runway)
بګرام دوه اساسي رنوې لري:
یوه یې شاوخوا ۳۶۰۰ متره اوږدوالی لري.
دویمه یې هم له ۳۰۰۰ مترو زیاته اوږده ده.
دواړه رنوې د درنو نظامي الوتکو لکه C-17 او B-52 لپاره ډیرې مناسبې دي، چې په سیمه کې ساری نلري.
3. هوایي ټاور (ATC) او رادار سیسټمونه
بګرام د پرمختللي ATC ټاور او راداري سیسټمونو درلودونکی و چې د الوتنو کنټرول، څارنه، او مدیریت یې اسانه کاوه.
د شپې او خرابې هوا لپاره د Instrument Landing System (ILS) امکانات لري، چې په سیمه کې بدیل نلري.
4. تأسیسات او انجینري جوړښتونه
د تیلو زیرمې، وسایطو لپاره پارکینګ، هوټلونه، روغتون، د ساتنې دیوالونه، سړکونه، د اوبو مدیریت، فاضلاب سیستم، او د برېښنا تولید واحدونه لري.
د بګرام هوایي اډې ډېری تأسیسات د امریکایي انجینرانو له خوا جوړ شوي، او د قوي نظامي انجنیرۍ معیارونه پکې پلي شوي.
5. د تخلیې سیسټمونه او امنیتي زیرساختونه
بګرام د پرمختللي امنیتي سیسټم لرونکی و؛ لکه د خنډونو، نظارتي کامرو، بایومتریکو تفتیشونو او وسلوالو ساتونکو کارونه.
د چاودنو ضد جوړښتونه، د ژغورنې خوندیتوب خونو (bunkers) او سرپوښل شوي سړکونه پکې شامل دي.
نوټ: ټرمپ په هره مهمه غونډه کې ددې اډې په اړه احساساتی څرګندونې کوي چې دا ددې نظامي آډې مهموالې څرګندوي.
راټولوونکی د ۲۲۱ شهید آفتاب رح فرقې د سوق ادارې آمر
انجینر نورالرحمن-جواد-
